बीड शहर

बीड, (प्रतिनिधी):- येथील वाहतुक शाखेने चोरीच्या मोटारसायकलींचा छडा लावण्याच्या उद्देशाने दोन महिन्यांपासुन तपासणी मोहिम हाती घेतली आहे. रस्त्यावरील मोटारसायकलींना थांबवून त्यांच्याकडे कागदपत्रांची विचारणा केली जात आहे. दोन महिन्यांमध्ये साडे आठ हजार मोटार सायकलींची तपासणी करण्यात आली असुन त्यामध्ये ५८ दुचाकी संशयास्पदरित्या त्या पोलिसांच्या ताब्यात आहेत. त्यातील एक गाडी चोरीचे असल्याचे निष्पन्न झाले आहे. दरम्यान तपासणीच्या दृष्टीने सदरील मोहिम राबविण्यात आलेली असुन वाहनधारकांनी कागदपत्र दाखवून सहकार्य करावे असे आवाहन वाहतुक शाखेचे पोनि.सुरेश बुधवंत यांनी केले आहे.

बीड, (प्रतिनिधी):- संसदीय कामकाजामध्ये अडथळा निर्माण केल्याने आज सत्ताधारी भाजपच्या वतीने दिल्लीपासून गल्लीपर्यंत लाक्षणिक उपोषण केले जात आहे. पंतप्रधान नरेंद्र मोदी यांच्या आदेशाचे पालन करीत येथील जिल्हा अधिकारी कार्यालयासमोरही या लाक्षणिक उपोषणास सुरवात झाली आहे. खा.डॉ. प्रीतम मुंडे यांच्यासह आमदार आणि पदाधिकार्‍यांनी जिल्हा कचेरीसमोर उपोषण सुरू केले आहे.

सडनी, (वृत्तसंस्था):- महाराष्ट्राच्या पठ्ठ्याने राष्ट्रकुलचं मैदान गाजवलं. बीडचा पैलवान आणि वस्ताद काका पवार यांचा पठ्ठ्या राहुल आवारेने ५७ किलो वजनी गटात सुवर्णपदकाची कामगिरी केली. राहुलने राष्ट्रकुल क्रीडा स्पर्धेत गोल्ड मेडल जिंकलं.राहुलने सव्वा तासात तीन कुस्त्या एकहाती जिंकून ढाण्यावाघासारखी फायनलमध्ये धडक मारली. फायनलध्ये त्याचा मुकाबला कॅनडाच्या स्टीव्हन ताकाहाशी विरोधात होता.राहुलची शरिरयष्टी स्टीव्हन ताकाहाशीच्या तुलनेत किरकोळ होती. राहुल ही कुस्ती मारणार का असा प्रश्न अनेकांना पडला होता. मात्र राहुलने पहिल्यापासूनच चित्त्यासारखी चपळाई दाखवली.

कासारी, (प्रतिनिधी):- धारुर तालुक्यातील कासारी गावत पिण्याच्या पाण्याचा प्रश्न दिवसेंदिवस गंभीर होत आहे. वीजपुरवठा खंडित असल्याने पाणी पुरवठा करण्यास अडचणी निर्माण होत आहेत. त्वरित रोहित्र उपलब्ध करून पिण्याच्या पाण्याची सोया करावी या मागणीसाठी मंगळवारी ग्रामस्थांनी अमरण उपोषण सुरु केले आहे. गावालगतचे रोहित्र जळाल्याने आठ दिवसांपासून कासारी गावाला पाणीपुरवठा करण्यास अडचणी निर्माण होत आहेत. यासंबंधी सरपंच यांनी वरिष्ठ कार्यालयाकडे अर्जही दाखल केला आहे.