रिक्षा चालकानेच प्रवाशाला लूटले बीडमधील प्रकार; तासाभराच्या आत चालक गजाआड

बीड, (प्रतिनिधी):- रिक्षामध्ये बसलेल्या प्रवाशाला चालकानेच लुटल्याचा प्रकार काल सायंकाळी शहरातील नगरनाका परिसरात घडला. प्रवाशाने पोलिसात तक्रार देताच तासाभरात पोलिसांनी रिक्षा चालकाला गजाआड केले. या प्रकरणी शिवाजीनगर पोलिस ठाण्यात चालकाविरुद्ध गुन्हा दाखल करण्यात आला आहे.

बीड शहरातील शिवाजीनगर पोलिसात आण्णा शेंदाळे (रा.पिंपरगव्हाण) यांनी दिलेल्या फिर्यादीत म्हटले आहे की, कामानिमित्त ते काल सायंकाळी बीड शहरात आले होते. बसस्थानकापासुन एका रिक्षामध्ये बसुन ते नगररोड मार्गे जात असतांना नगरनाका परिसरात चालकाने रिक्षा बाजूला घेऊन शेंदाळे यांना मारहाण केली. यावेळी त्यांच्या खिशातील सतराशे रुपये बळजबरीने काढून घेतल्याचे नमुद करण्यात आल्याने रिक्षा चालक हिरामन वडमारे यांच्या विरुद्ध कलम ३९२ प्रमाणे शिवाजीनगर पोलिस ठाण्यात गुन्हा दाखल करण्यात आला आहे. पोलिसांनीही घटनेचे गांभीर्य ओळखून रिक्षा चालकाचा शोध घेणे सुरु केले. पोनि.पुरभे यांच्या मार्गदर्शनाखाली पोकॉ.खेडकर, शेख सलीम, गर्जे, तांबारे, बन्सोडे आदिंनी तासाभराच्या आत रिक्षा चालकाचा शोध घेऊन त्यास गजाआड केले.