वर्‍हाडाच्या टेम्पोची मोटारसायकलला धडक; तिघे गंभीर जखमी

बीड (प्रतिनिधी) वर्‍हाड घेऊन जाणार्‍या टेम्मोने दुचाकीला समोरून दिलेल्या धडकेत दुचाकीवरील तीन युवक गंभीर जखमी झाल्याची घटना शिरूर तालुक्यातील खालापूरीजवळ मंगळवारी दुपारी घडली. अपघातानंतरही जखमी युवकांना तिथेच सोडून पळून जाणारा टेम्पो सात किलोमिटर पाठलाग करून ग्रामस्थांनी पकडला.

 शिरूर तालुक्यातील आर्वी येथील धनराज मळेकर, नितीन घरगीने व गोटू यादव हे तीन युवक दुचाकीवरून आर्वीहून बीडकडे जात होते. खालापूरी जवळ बीडहून मुंगुसवाडे (जि.नगर) येथे वर्‍हाड घेऊन जाणारा टेम्मो (क्रं.एम.एच.१४ ए.एच.६१५०) ने मोटारसायकल (क्रं.एम.एच.२३, एम.४७४९) ला समोरून जोराची धडक दिली. या अपघातात तीनही युवक गंभीर जखमी झाले आहेत. त्यांना उपचारासाठी जिल्हा सामान्य रूग्णालयात दाखल करण्यात आले आहे. दरम्यान, अपघातानंतही चालकाने टेम्पो न थांबवता पळ काढला. सात किलोमीटरवर आर्वी गावात ग्रामस्थांनी टेम्पो पकडला.