चौसाळ्यात घरफोडी

चौसाळा (प्रतिनिधी) येथील नाईकवाडे गल्लीत चोरट्यांनी धुडगूस घालत एकाच रात्री दोन ठिकाणी चोर्‍या केल्या. त्यापैकी एका घरातून रोख रकमेसह सोन्या चांदीचे दागिणे लंपास केल्याचा प्रकार उघडकीस आला आहे. या प्रकरणी पोलिसांनी घटनास्थळी भेट देवून पंचनामा केला आहे. दरम्यान चोरीच्या घटनेमुळे नागरीकांमध्ये भितीचे वातावरण पसरले आहे.

चौसाळा येथील संतोष कल्याण नाईकवाडे हे कुटूंबियांसह बाहेर गावी गेले असता मध्यरात्री अज्ञात चोरट्यांनी त्यांच्या दरवाजाचे कुलूप तोडून कपाटातील रोख रकमेसह सोन्या चांदीचे दागिने, नव्या साड्या व अन्य साहित्य लंपास केले. त्यानंतर चोरट्यांनी संतोष नाईकवाडे यांचे भाऊ गौतम नाईकवाडे यांच्या घरातही चोरीचा प्रयत्न केला. मात्र शेजारच्या लोक जागे झाल्याने त्यांचे प्रयत्न फसले. अन्य एका ठिकाणीही चोरीचा प्रयत्न झाल्याचे समजते. घटनेची माहिती कळताच चौसाळा चौकीतील पोलिसांनी घटनास्थळी भेट देवून पंचनामा केला आहे. संतोष नाईकवाडे यांचे कुटूंब बाहेरगावी असल्याने चोरांनी नेमका किती ऐवज लंपास केला याची माहिती पोलिसांना मिळाली नाही.