विद्यार्थ्यावर कुत्र्यांचा हल्ला

बीड, (प्रतिनिधी):- शहरातील इस्लामपुरा भागात शाळेत जात असलेल्या एका विद्यार्थ्यावर चार ते पाच कुत्र्यांनी हल्ला केल्याची घटना आज सकाळी घडली. सदर विद्यार्थी हल्ल्यात जखमी झाला आहे. दरम्यान इस्लामपुरा, अजिजपुरा, धांडे गल्लीसह अनेक भागांमधील मोकाट कुत्र्यांचा बंदोबस्त करण्याची मागणी नागरिकांतून होत आहे.
    बीड शहरातील इस्लामपुरा भागातील शेख अमान शेख जावेद हा आज सकाळी शहेंशावली दर्गा रोडने शाळेकडे जात असतांना आज सकाळी तेथील एका डिपीजवळ असलेल्या चार ते पाच कुत्र्यांनी त्यांच्यावर हल्ला चढवला. त्यामध्ये शेख अमान हा जखमी झाला असुन त्याच्यावर रुग्णालयात उपचार करण्यात आले आहे. गेल्या काही दिवसांपासुन इस्लामपुरा, अजिजपुरा, धांडेगल्ली आदि भागांमध्ये मोकाट कुत्र्यांची संख्या वाढली असुन त्यामुळे नागरिकांना मोठा त्रास सहन करावा लागत असुन शालेय विद्यार्थ्यांच्या जिवावरही बेतण्याची शक्यता वर्तवली जात आहे. त्यामुळे मोकाट कुत्र्यांचा पालिकेने बंदोबस्त करावा अशी मागणी होवू लागली आहे.