ट्रक-कमांडरचा अपघात; एक ठार, चौघे गंभीर केसापुरी कॅम्पजवळील घटना

माजलगाव, (प्रतिनिधी):- येथील केसापुरी कॅम्पजवळ असलेल्या सुवर्णा मंगल कार्यालयासमोर एका वाळूच्या ट्रकने प्रवासी वाहतुक करणार्‍या कमांडरला जोराची धडक दिल्याने झालेल्या अपघातात एक जण जागीच ठार तर चौघे जण गंभीर जखमी झाल्याची घटना सकाळी १०.३० वाजण्याच्या सुमारास घडली आहे. जखमींना माजलगाव येथील ग्रामीण रुग्णालयात उपचारासाठी दाखल करण्यात आले आहे.
माजलगाव येथे मोठ्या प्रमाणात अवैध वाळू उपसा होतानाच्या तक्रारी ऐकवयास मिळतात. मात्र यावर प्रशासन कारवाई करण्यात दुर्लक्ष करीत असल्याचे पहावयास मिळते. आज एका वाळूच्या ट्रक क्र.(एमएच.०४-२६४६) ने प्रवासी वाहतूक करणार्‍या कमांडर क्र. (एमएच. १५-७११६) ला जोराची धडक दिल्याने या अपघातात दिगंबर अंकुशराव तौर (४०, रा.कवडगाव थडी) हे जागीच ठार झाले तर रमजान शेख (४०), गणेश तौर (२७), सुषमा तौर (२५) यांच्यासह अन्य एक जण जखमी झाले आहे. हा अपघात इतका भिषण होता की ट्रकच्या धडकेने कमांडर रस्त्याच्या बाजूला जाऊन कोसळली होती. जखमींवर माजलगावच्या ग्रामीण रुग्णालयात उपचार सुरु असुन घटनेचा पंचनामा पोलिसांनी केला आहे