बीडमध्ये तलवारबाजी; दोन विद्यार्थी गंभीर जखमी

बीड (प्रतिनिधी) मोटारसायकलवर महाविद्यालयाच्या दिशेने जात असलेल्या दोन विद्यार्थ्यांवर दहा ते पंधरा जणांनी तलवारीने हल्ला केल्याची घटना दुपारी एक वाजण्याच्या सुमारास नाट्यगृह परिसरात घडली. या हल्ल्यात दोघेजण गंभीर जखमी झाले असून त्यांच्यावर जिल्हा रूग्णालयात उपचार सुरू आहेत. जुन्या वादातून हा प्रकार घडल्याचा अंदाज पोलिसांनी व्यक्त केला आहे.

बीड शहरातील प्रतिक श्रीधर दोडके (१८, रा.अंकुशनगर), उमेश अशोक पांढरे (१८, गयानगर) हे दोघेजण मोटारसायकलवरून महाविद्यालयाकडे जात असतांना पाठीमागून तोंडाला रूमाल बांधून आलेल्या दहा ते पंधरा जणांनी प्रतिक व उमेश यांच्यावर तलवारीने हल्ला केला. यामध्ये दोघेही गंभीर जखमी झाले असून प्रतिक दोडके याच्या पाठीला तर उमेश पांढरेंच्या दोन्ही हातावर दुखापत झाली आहे. दोघांवरही जिल्हा रूग्णालयात उपचार सुरू आहेत. याप्रकरणी दुपारी उशिरापर्यंत गुन्हा दाखल करण्याची प्रक्रिया सुरू होती.