धानोरा रोड वरील खड्डे बुजवा

बीड (प्रतिनिधी) शहरातील धानोरा रोडवर ठिकठिकाणी खड्डे पडले असून यामुळे नागरीकांना याचा मोठा त्रास सहन करावा लागत आहे. धानोरा रस्त्यालगत शाळा, क्लासेस, वस्तीगृह, चित्रपटगृह असल्याने नागरीकांची या रस्त्यावर मोठी वर्दळ असते. ठिकठिकाणी पडलेल्या खड्ड्यांमुळे नागरीकांना याचा नाहक त्रास सहन करावा लागत असून सार्वजनिक बांधकाम विभागाचे अभियंता नाईकवाडे यांनी खड्डे बुजवण्यासाठी तात्काळ पाऊल उचलावे. अशी मागणी या भागाचे नगरसेवक भैय्यासाहेब मोरे, रंजित बनसोडे यांनी केली आहे.

धानोरा रस्त्यावर मोठी वर्दळ असल्यामुळे या रस्त्यावर मोठी वाहतुक होते. शाळा, महाविद्यालयीन मुले आणि इतर कामासाठी बाहेर पडलेल्या नागरीकांना रस्त्यांवरील खड्डे चुकवण्याचा दैनंदिन त्रास सहन करावा लागत आहे. पालवण चौक ते नरसोबा नगर या भागाततर मोठ्या प्रमाणात रस्त्याची चाळणी झाली असून रस्त्यावर चालणे अवघड झाले आहे. ठिकठिकाणी पडलेल्या खड्यांमुळे वाहनधारकांनाही तारेवरची कसरत करावी लागत आहे. याकडे सार्वजनिक बांधकाम विभागाने लक्ष देवून तात्काळ धानोरा रोडवरील खड्डे बुजवावेत अशी मागणी नगरसेवक भैय्यासाहेब मोरे, रंजित बनसोेडे यांनी केली आहे.