बीड बायपासवर पुन्हा अपघात क्लिनर ठार; चालक जखमी

बीड (प्रतिनिधी) दोन मालवाहु ट्रकची समोरासमोर धडक होवून झालेल्या भिषण अपघातात क्लिनर जागीच ठार झाला. तर चालक गंभीररित्या जखमी झाल्याची घटना आज सकाळी दहा वाजण्याच्या सुमारास बीड बायपासवरील इमामपुर रोडजवळ घडली. अपघातात दोन्ही वाहनांचा समोरील भाग चक्काचुर झाला आहे.

बीड बायपासवर अपघातांची मालिका सुरूच असुन आठवडाभरापूर्वी झालेल्या भिषण अपघातानंतर त्याचठिकाणी आज सकाळी पुन्हा भिषण अपघात झाला आहे. धारूरकडून धुळ्याकडे जाणारी ट्रक (एम.एच.१६ क्यु.७५०७)ला समोरून येणार्‍या ट्रक क्र.(आर.जे.२० जी.बी.४१७२) या गाडीने जोराची धडक दिली. या अपघातात ट्रक क्र.(एम.एच.१६ क्यु.७५०७)चा क्लिनर गोगा कांबळे (वय ३० रा.केज) याचा जागीच मृत्यू झाला. तर चालक शेख लतीफ शेख उस्मान (रा.मस्साजोग ता.केज) हे गंभीररित्या जखमी झाले आहेत. दुसर्‍या ट्रकचे चालक, क्लिनर अपघात होताच फरार झाले आहेत.