वीज कंपनीच्या कार्यालयातच ग्राहकाने घेतले विष

बीड (प्रतिनिधी) विज मीटर कनेक्शनसाठी लाईनमन निर्मळ यांच्याकडे पैसे भरूनही त्यांनी दोन दिवसापूर्वी दिलेले मीटर काढून घेत कनेक्शन तोडल्याचा आरोप करत एका ग्राहकाने आज सकाळी विष प्राशन केले. बार्शी नाका येथील विज कंपनीच्या कार्यालयातच हा प्रकार घडला असून आत्महत्येचा प्रयत्न करणार्‍या ग्राहकाला रूग्णालयात दाखल करण्यात आले आहे.

बीड शहरातील अचानक नगर भागातील शेख अनिस शेख अब्दुल उर्फ टेलर (५०) यांनी विज कनेक्शनसाठी लाईनमन निर्मळ यांच्याकडे तीन हजार रूपये भरले होते. त्यानुसार निर्मळ यांनी शेख अनिस यांना विज कनेक्शन देवून मीटर बसवले होते. मात्र दोन दिवसापूर्वी निर्मळ यांनी कर्मचार्‍यांसह येवून कनेक्शन तोडले असा आरोप करत शेख अनिस शेख अब्दुल यांनी बार्शी नाका येथील विज कंपनीच्या कार्यालयात विष प्राशन करून आत्महत्येचा प्रयत्न केला. या प्रकाराने खळबळ उडाली असून यापुर्वीही बार्शी नाका येथील कार्यालयात आत्महत्येचा प्रयत्न झालेला आहे. बार्शी नाका येथील विज कंपनी कार्यालयातील कर्मचार्‍यांच्या विरोधात वारंवार तक्रारी वाढत असूनही वरिष्ठ अधिकारी याकडे बघ्याची भुमिका घेत असल्यानेच असे प्रकार वाढत असल्याचे बोलले जात आहे.